يعيش البارد على قفا المحموق

محمد خلف الشمري


يلي بتحب النعناع هذا النعناع نعناعنا يا ابا هذا النعناع نعناعنا حبينا واتلوعنا اتفرقنا واتجمعنا راحوا احباب واجو احباب ما بدري ايش الاسباب؟..
الشاب: عيني عليك باردة يا منعنع ما شاء الله طلعت من متابعين قناة طيورالجنة كدز؟.
الشايب: وش على بالك؟ يابوك هذا اللي علموني إياه الورعان مالكم حلفان علي لعبوا بي لعب!.. كل شوي جدي "أسجل" حطلنا على القناة الفلانية لدرجة كل ارقام قنوات البزارين حافظهم صم وعن ظهر قلب وكبد وطحال.
وارجع لمحور حديثي السابق وخلوني اقولكم عن بعض فوائد النعناع لان الشعب بحاجتهم وراح"الدواء قبل الفلعة" من شر بالافق يتدلى يجي يوم لهذا ومنها يخفف من عسر الهضم ويخلصكم من الاحتقان ويعالج الانفلونزا والبرد ويقلل من معدل ضغط الدم وأوراقه تساعد على الاسترخاء من التشنجات وتقوي المناعة.
الخبير: حيلك حيلك بالراحة علينا والا أقولك يا حاج هات من الاخر قول ما تخفش لاني عارف ان اول الرقص حنجلة.
الشايب: على ما اعتقد كلكم تابعتوا نهائي أوروبا بين العمام والطليان وشفتوا لعبهم شفناه وشفتوا الكاس والناس وياه يا كثرهم كثراه، يا عيالي بعد مشاهدتي لخمسة وستين الف متفرج تارسين المدرجات ايقنت وانا بكامل قواي العقلية وشك للحيط وقفاك ليا بأن عندنا شي غلط،معقولة "منغصين علينا عيشتنا" حنا لليوم متباعدين بالمساجد؟!.. وحارمين أغلبية الشعب من دخول المجمعات التجارية "أفلسوا" بحجة انهم ما طعموا!.. واللي راجع من السفر لابد من انه يسجل بكويت مسافر "سيئ الذكر" وبهدلته والا ماله رجعه لديرته !.. والله يا اكسلانس بديت أشك واخيط ان بالموضوع "انّ" وثلاثة من اخواتها !.. بالعربي انا ماني ولا كاني مستوعب هالقرارات المعلبة التي تطبق على البسطاء من الناس فقط !.. ولهذا اقول ياليت تجربون وصفة منقوع النعناع لريلاكس افضل وأنتم ترددون يلي بتحب النعناع هذا النعناع نعناعنا!. المتمولس: قالوا في الأمثال يعيش البجح على قفا المكسوف ويعيش البارد على قفا المحموق! وفي هذه الاثناء رفع على مسامعنا الشيخ زغلول اذان الظهر.

كاتب كويتي
‏[email protected]